Удз гъэгъа щхъуантIэ

Уэ жэщым пщIыхьу узолъагъур,
Уэ махуэ псом ущIэтщ си нэгу.
Зэм уафэ лъащIэм ущогъагъэ,
Утетщ зэм Iуащхьэмахуэ щыгу.
ГугъапIэ щэхур цIыху къэс епту
Уэращ щагъафIэр я гухэлъ.
Уэ ури-Беатричет Данте,
Петраркэ и псэр Лаурэу пхэлът.
Новалис псэкIэ къыпщIэбэгыу
Iэрамэ и гум уэ ущищIт…
АрщхьэкIэ уду уэ уобзэхри…
Къыплъыхъуэ псори мэхъу IэнэщI.
Укъыпысчыныр си нэрыгъыу,
Сэ гъуэгущхьиблыр зэпызоч.
Укъитщи уэ си гупэм гугъэу,
СынэIэбэхукIэ - усIэщIокI.
«Насып щIэкъуныр - арщ насыпыр».
Емышу си псэм укъелъыхъу.
СынакIуэм уэ сыпкIэлъыIэбэу -
СыптеIэбэну сэ къысщохъу…
Ныплъыхъуэ защIэу цIыхум гъащIэр,
Уи гъуэгум тетурэ, еух.
Щытар зи гъащIэр мурад защIэу -
Уэ уи лъыхъуакIуэ щIылъэм йох.
Абдеж, уи щэхуу хъуар къэптIатэу, -
Хуэдэу езым укъыхэкIыж, -
Уэ къызэрыкIуэ розэ щхъуантIэу
И кхъащхьэм лIам укъытокIэж.
1967 гъэ

Vocabulary:

1. уафэ: sky
2. удз: grass, plant
3. гъэгъа: flower, blossom, blume
4. къэс: 1. each, every 2. to (indicating the limit, border or extent of sth)
5. махуэ: 1. day (not night) 2. day (24 hour period) 3. day, date (of the month)
6. зэм: 1. то..., то... 2. один раз..., другой раз...
7. хуэдэу: 1. as, like 2. as though, as if, like
8. мурад: goal, objective, intention
9. щэхуу: 1. secretly, in secret 2. quietly, soundlessly
10. гъэ: 1. year 2. summer
11. хъуар: all, everybody, everyone, everything
12. розэ: rose